रेडक्रस सोसाइटीद्वारा सञ्चालित विभिन्न सेवाहरु दशैँमा पनि निरन्तर रहने

नेपाल रेडक्रस सोसाइटीद्वारा सञ्चालित विभिन्न सेवाहरु दशैँको लामो छुट्टीमा पनि निरन्तर रहने व्यवस्था मिलाइएको छ । कुनै विपदका घटनाहरु आइपरेमा केन्द्रीय स्तरमा विपद् व्यवस्थापन विभागका उपनिर्देशक हरि मोहन श्रेष्ठको संयोजकत्वमा रहेको टोली सक्रिय रहने बताइएको छ । सो स्ट्यान्डबाई टोलीमा रमेश घिमिरे, अनिल महर्जन, निमराज राउत, राजेन्द्र रोकाहा र सविता सिं रहेका छन् ।

यस्तै केन्द्रीय कार्यालयमा अवस्थित रक्तसञ्चार सेवा पनि सुचारु हुनेछ । दैनिक ६ जनाले ड्युटी गर्ने व्यवस्था मिलाइएको र एक हजार २ सय युनिट रगत स्टकमा राखिएको जानकारी गराइएको छ । दशैँ छुट्टीमा सामान्यतया यो स्टक पर्याप्त हुने आँकलन गरिएको छ ।

शनिबारबाहेक हरेक दिन विहान ७ बजेदेखि बेलुका ७ बजेसम्म सञ्चालन हुँदै आएको नेपाल रेडक्रसको निःशुल्क ‘हटलाइन सेवा ११३०’ महाअष्टमीदेखि एकादशी (असोज १९ गते देखि २२ गतेसम्म) नेपाल टेलिकमका ग्राहकको लागि बन्द रहेपनि एनसेलबाट आउने कलहरुका लागि भने यो सेवा विदाका ती दिनहरुमा पनि नियमित रहने जानकारी गराइएको छ ।

दशैँको लामो छुट्टीमा पनि रेडक्रसका सेवा तथा गतिविधिबारे टिप्पणी, सुझाव, गुनासो वा प्रश्नहरु भएमा हटलाइन ११३० मा एनसेलका मोबाइल फोनबाट निःशुल्क फोन गर्न र सेवा लिन सकिने व्यवस्था गरिएको जानकारी गराइएको छ ।

Leave a Reply

Your email address will not be published. Required fields are marked *

Back to top button
Close