६ हजार तिरेर छुटे मनाङे

पोखरा । गण्डकी प्रदेश सभा सदस्य राजीव गुरुङ उर्फ दीपक मनाङे ६ हजार धरौटी बुझाएर रिहा भएका छन् । एन्फा कास्कीका अध्यक्ष मिलन गुरुङमाथि कुटपिट गरेको आरोपमा पक्राउ परेका मनाङे ४ दिनपछि हिरासतबाट रिहा भएका हुन् । पीडित गुरुङले बुधबार आफुमाथि सार्वजनिक कार्यक्रममा झापड हानेको आरोप लगाउँदै उनी विरुद्ध जिल्ला प्रहरी कार्यालय कास्कीमा उजुरी दर्ता गराएका थिए । सोही उजुरीका आधारमा विहीबार पक्राउ परेका मनाङेलाई सरकारी वकिल कार्यालयले लिएको बयानका आधारमा जिल्ला प्रशासन कार्यालयबाट २ दिन म्याद थपिएको थियो । थप बयान दिएर उनी आइतबार साँझ रिहा भएका हुन् । सांसद मनाङेलाई आउँदो फागुन १३ गतेका लागि तारिख तोकिएको छ । उजुरीमा कुनै माग दावी नगरिएका कारण सामान्य धरौटीमा रिहा गरिएको जिल्ला प्रशासन कार्यालयले जनाएको छ ।
गत मंगलबार लेखनाथको भण्डारढिकमा आयोजित मुख्यमन्त्री कप फुटवक कार्यक्रमको उद्घाटन समारोहमै उनले एन्फा अध्यक्ष मिलन माथि कुटपिट गरेका थिए । आफूले झापड हानेको स्विकार्दै उनले एन्फाले गरेका भ्रष्टाचारको घटना बाहिर ल्याउन र आफ्नो जिल्लाका खेलाडीको ब्यवस्थापन राम्रो नगरेको आरोप लगाएका थिए । रिहा भएपछि पनि उनले जनप्रतिनिधिको जिम्मेवारी आफुले पूरा गरेको प्रतिक्रिया दिएका छन् । ‘म त कर्मचारी होईन नि । जनताले जिताएर पठाएको हो नि । मलाई मार्दैनन् भोलि उनीहरुले ?,’ उनले भने, ‘हाम्रो पोखरामा कोही छैन । सबै काठमाण्डौंमा छन् । यहाँ कसलाई भन्ने ? मैले सहयोग गर्नुपर्दैन ?’ नेताहरुले नै ठगको बोस बनेको उनले आरोप लगाए ।
राजनीतिक मुद्दा बनाईएको भन्दै उनले यो गलत भएको टिप्पणी गरे । ‘हामीले मुद्दा हाल्नुपर्नेमा उ आफै ठग्ने, आफै मुद्दा हालेको छ । मैले त्यसको विरुद्ध मुद्दा हालेको छैन । तर जव लडाईं सुरु भयो त्यसलाई राजनीतिक रुपमा जोडियो । मनाङबाट आएको क्लवलाई हेरेन भनेर मैले डिस्कस गरेको हो । तर यो मान्छेले यति ठूलो स्क्याण्डल गरिदियो । आफैले दुख पाईराछ,’ उनले भने, ‘यस्तो सामान्य डिस्कसलाई पनि राजनीतिक मुद्दा बनाईयो । यो राजनीतिक समस्या होईन ।’
उनले एन्फाको भ्रष्टाचार उजागर भएको बताए । ‘एन्फाको भ्रष्टाचार खुलेको छ । विदेशीहरुले नेपालीलाई पैसा पठाएको हुन्छ । खेलोस् भनेर । पाएको पैसा जति यिनीहरु एक्लै खाएका छन्,’ उनले थपे, ‘फिफाको पैसा सबै मिलेर खान थाले । एन्फाको अध्यक्षलाई हेर्नुस, जहिले प्लेनमा हिँड्छ, शेर्पा हो त्यो, खासमा पहिले गाइड हो त्यो, अहिले अध्यक्ष भएपछि बौलाएको छ, प्लेनमै सुत्छ रे त्यो ।’

Leave a Reply

Your email address will not be published. Required fields are marked *

Back to top button
Close