रोटरीको डिष्ट्रिक्ट सम्मेलन आजदेखि

पोखरा । पोखरामा शुक्रबारदेखि रोटरी इन्टरनेसनल डिष्ट्रिक्ट ३२९२ को १२ औं डिष्ट्रिक्ट सम्मेलन हुँदैछ । नयाँबजारस्थित प्रदर्शनी केन्द्रमा तीन दिनसम्म चल्ने सम्मेलनको तयारी पूरा भएको रोटरीका डिष्ट्रिक्ट गभर्नर किरणलाल श्रेष्ठले जनाए ।
सम्मेलनको रोटरी इन्टरनेसनलका नोमिनी प्रेसिडेन्ट शेखर मेहताले उद्घाटन गर्ने कार्यक्रम छ । सम्मेलनमा रोटरी इन्टरनेशनलका प्रतिनिधि एन् विसेट एस्वोल, नेपाल सरकारका परराष्ट्रमन्त्री प्रदीपकुमार ज्ञवाली, पर्यटन मन्त्री योगेशकुमार भट्टराई, गण्डकी प्रदेशका मुख्यमन्त्री पृथ्वीसुब्बा गुरुङलगायतले सम्बोधन गर्नेछन् ।
रोटरी सम्मेलनका कार्यक्रम संयोजक गोपाल ध्वजुका अनुसार कन्फरेन्स हल, स्टेज निर्माणदेखि अतिथि र रोटरीयन सबैलाई न्यानो आतिथ्यको तयारी गरिएको छ ।
सम्मेलनमा करीब २ हजार ५ सय रोटरीयन सहभागी हुने आयोजकले जनाएको छ । नेपालमा १२४ रोटरी क्लब तथा भुटानमा रहेको एउटा रोटरी क्लबका सदस्य सहभागी हुने सचिव डिल्लीप्रसाद शर्माले बताए ।
सम्मेलनमा अमेरिका, जापान, ताइवान, अमेरिका, स्वीडेन लगायतका देशका रोटरियन पनि सहभागी हुने छन् ।
नयाँबजारदेखि प्रदर्शनी केन्द्र जाने बाटोसम्म १० वटा स्वागत द्वार निर्माण गरिएको छ । कार्यक्रमस्थलमा सुरक्षा ब्यवस्था चुस्त बनाइएको छ । कार्यक्रमस्थल सुरक्षित बनाउन १२ वटा सिसी क्यामरासमेत जडान गरिएको उनले बताए । कार्यक्रमस्थलमा पोखराका सम्पदा झल्कने गरी हिमाल र ताल बनाइएको छ भने गण्डकी प्रदेशमा प्रचलनमा रहेको ‘घुमाउने घर’ निर्माण गरिएको छ ।
सम्मेलनमा रोटरी क्लब र रोटरियनले गरेका कामको समीक्षा, अनुभव आदानप्रदान र आगामी वर्ष गरिने कामबारे छलफलसहित योजना बनाइने छ ।
सम्मेलनमा रोटरीले गर्ने सामाजिक सेवाका विभिन्न श्रोत तथा आयामबारेमा सम्बन्धित क्षेत्रका विज्ञहरुले प्रस्तुति राख्नेछन् । अन्त्यमा फेलोसीप हुनेछ ।
यसैबीच, रोटरी सम्मेलनको पूर्व सन्ध्यामा कार¥याली निकालिएको छ । सम्मेलनको प्रचारप्रसार गर्ने तथा पर्यटन प्रवद्र्धन गर्ने उद्देश्यले काठमाडौंदेखि पोखरासम्म कार ¥याली निकालिएको संयोजक दीवाकरराज कर्णिकारले जानकारी दिए । गण्डकीमा हाल १६ वटा रोटरी क्लब संचालित छन् ।

Leave a Reply

Your email address will not be published. Required fields are marked *

Back to top button
Close