आज बेलायतमा तापक्रम पाँच दशकयताकै  उच्च

पोखरा। बेलायतमा आज (मंगलबार) को तापक्रम  विगत ५३ वर्षयताको मार्चमध्यकै सबै भन्दा बढी हुने बताइएको छ ।

आजको तापक्रम २४ डिग्रीसम्म पुग्नेछ, जुन सन् १९६८ पछिका मार्चमध्ये सबैभन्दा तातो दिनको रुपमा सावित हुनेछ । साथै  आजको तापक्रम यस वर्षको पनि सबैभन्दा उच्च तापक्रम हो । सन् १९६८ को मार्च २९ का दिन २५।६ डिग्री तापक्रम रेकर्ड गरिएको थियो ।

कोरोना संक्रमणको महामारीका कारण इङ्ग्ल्यान्डमा जारी लकडाउन खुकुलो गरेको २४ घन्टामा बेलायतको तापक्रम अत्यधिक रुपमा बढेको हो । लकडाउन खुल्ला गरिएको दिन सोमबार पनि बेलायतको मौसम विगतको तुलनामा निकै घमाइलो बनेको थियो । उक्त दिन इङ्ग्ल्याण्डवासीहरुले महिनौदेखि एकआपसमा भेट्न नपाएका आफन्तहरूसँग घरबाहिर दुई परिवार वा ६ जनासम्म भेटघाट पाएका थिए ।

कोरोना संक्रमण दर र मृत्युदरमा केहि कमी आएपनि युरोपका केहि मुलुकमा संक्रमणको तेस्रो लहर शुरु भएपछि बेलायतमा पनि विशेष सतर्कता अपनाउनुपर्ने सरकारले बताउँदै आएको छ । लकडाउन सहज गरिएपनि सावधानी अपनाउन सबैलाई आग्रह गरिएको छ ।

बेलायतमा कोरोना संक्रमणका कारण  एक लाख २६ हजार बढीको मृत्यु भइसकेको छ भने ४३ लाख ३७ हजार भन्दा बढी संक्रमित भइसकेका छन् ।

यसैगरी बेलायतमा हालसम्म खोपको पहिलो र दोस्रो गरि तीन करोड ४१ लाख १९ हजार ९५ डोज खोप वितरण भइसकेको  छ ।लन्डन

Leave a Reply

Your email address will not be published. Required fields are marked *

Back to top button
Close